قصيدة ورد

بسم الله الرحمن الرحيم

هذه قصدية للشاعر مشاري المشاري وهي شكر منه لما قام به بن العم ابراهيم بن محمد بن عبدالله الجردان ـ ابو فارس ـ من خدمة وموقف مشرف حيث يقول :ـ

 

سلام يا راعي الوفا والمواجيب

.                     سلام يا راعي المواقيف والجاه

سلام يا من يفعل الخير بالغيب 

.                        سلام ياصل لك على ما تمناه

تسلم يبو بدران يا راعي الطيب

.                      بالورد والريحان والعود نكساه

جدك على دربه وجيتوا مجاذيب

.                  والدوسري يحفظ أصوله ومجناه

إن جيتوا المسجد بوسط المحاريب

.                    وبالمرجله وصلتوا أعلا علاياه

عموق أبن جردان ما هيب أكاذيب

.                   يعرف بها القاصي وتدري دناياه

اليوم أبو فارس بعث لي مناديب

.                      يقول أبو بدران هذي وصاياه

وأقول شكرا جاوب الذيب للذيب

.                    وانتم ذخر من غاضبت فيه دنياه

شكرا لبو فارس عدته العذاريب

.                 عرض لي الخدمة عسى الله يرعاه

عيال عمي شرقها والمغاريب

.                   درعي وذخري يوم حزة رزاياه

عيال عمي يوم وقت المطاليب

.                      يخسا معاديها وتعومس أرياه

عيال عمي يوم شح المشاريب

.                          هداج تيما ما توقف ركاياه

على المعادي مطلقات المشاهيب

.                      واللي وسمنا له عصاته حميناه

إنشد وتنبيك الكتب والكتاتيب

.                      أمجادنا ما تنحصي في براياه

واللي تجاهلنا خبول ومصاويب

.                       ومن لا تعلم علمه بسبر دنياه

انا اشهد ان الطيب يبغي تجاريب

.                وطيبك وصل يا صاحبي لا عدمناه

واسلم وسلم يا عطيب المضاريب

.                    سلام منضوخ العسل في زواياه

وصلوا على اللي رتب الدين ترتيب

.                      وآله وصحبه عد ذاري ذراياه

مشاري المشاري

 

وهذا ردي على قصيدة الشاعر مشاري المشاري حيث قلت :ـ

 

أهلا هلا بك يا زعيم المواجيب

.                    يا الصاحب اللي دوم نفسي تمناه

ودي أشوفه وأنثر الورد والطيب

.                     وأفرش كبار الزل وأفرح بلقياه

أرحب مشاري بالغ ن ذروة الطيب

.                   أنا أشهد أنه كاسب الطيب يمناه

قافك وصلني ويا هلاة التراحيب

.                   قافك عزيز ن رايق الطيب مجناه

حنا بني جردان ولا فيه تجريب

.                      واللي تبي أبشر ولأمرك بذلناه

لا تشكر أخوانك فلاهم أجانيب

.                       حنا بني عمك ولأجلك زهمناه

حنا ذراك وعزوتك والمشاذيب

.                   لعداك , وحنا نقطع الشر ورشاه

حنا دواسر ما نهاب المحاديب

.                      من نسل بدرانَ الذي ما نسيناه

يشهد لنا التاريخ ولا فيه تكذيب

.                   مهوب حكي ن بالمجالس حكيناه

وصلاة ربي مَـد حـِـبر المكاتيب

.                     على محمد عد حرف ن قريناه

 

أحمد بن محمد الجردان